هل تعرف كيف تحمي نفسك من الاختراق !!!

الموضوووووع المنتظر ^__^ 

درس بسيط عن إزاي الواحد يقدر يحمي نفسه من الهاكر و ايه هي الحيل و الخدع إللي بيعملها الهاكر عشان يقدر يخترقك ....

.

.

.

.

.

.

أولاً قبل ما أبدء في الشرح .... الشرح ممكن يكون قديم للبعض و لكن أكيييد هيكووون مفيييد للبعض الأخر ....

بسم الله نبدء ...

إختراق الأجهزة و الإيميلات ::

----------------------------------

الأثنين يشتركون في معظم طرق الأختراق إن لم يكن فيه أختلاف او أكثر بينهم ... 

طب ايه هي الأول فكرة او ديناميكية الإختراق ... و بتحصل إزاي 

تعالوا نتخيل كدا حاجة بسيطة الريسيفر و الطبق فكرتهم ايه 

الطبق بيجمع الإشارة و الريسيفر بيفك تشفير الأشارة ديه ... بمعني أصح هنا فيه راسل و مستقبل 

الهاكر نفس الحكاية .. لازم يكون فيه سيرفر إللي بيبعته المخترق (الراسل) و يكون فيه مستقبل ( الضحية) و عن طريق السيرفر دا بيتم الأختراق .. طبعا ممكن هتسألوا هتقولوا ايه السيرفر دا ... حااضر هشرحه لسه 

السيرفر :

======

دا بيكون عبارة عن ملف تنفيذي .. هتقولولي يعني ايه تنفيذي يعني أمتداده ( .exe ) بمجرد ما يتم الضغط عليه بيشتغل داخل جهاز الضحية و بيختفي مع ملفات السيستم 

الملف دا بيكون حجمة قليل جدااااااااااااا لا يتعدى الـ 20kb طبعا مفيش حد يضحك عليك و يقولك أستقبل برنامج و يكون بالحجم دا أستحااااالة صح 

الملف دا بيكون ليه كذا أمتداد أشهرتهم ..

( .exe )

( .com )

( .bat )

( .scr ) 

وبيكون ممكن بالإسم دا server.exe 

كدا عرفنا فكرة بسيطة عن السيرفر و إزاي نعرفه لو حد بنعمل معاه شات و بعتلنا ملف و أمتداده زاي المكتوب كدا 

ممكن السيرفر دا يكون متشفر .. يعني ايه متشفر يعني عليه حماية من برامج الأنتي فيروس عشان مش يتكشف ... بس برامج و شركات الأنتي فيروس دلوقتي بقت بتاخد بالها من الحاجات ديه 

طيب ممكن السيرفر دا ياخد شكل تاني في الأمتداد بتاعه !!!!!

يعني يكون بدل ماهي امتداد فردي يكون امتداد زوجي !!!!!

براحة براحة محدش يقول مش فاهم ياعم انت بتقول ايه 

امتداد فردي يعني server.exe دا كدا امتداد فردي 

ممكن بقي حد يدمجه مع صورة مثلا او أغنية و يكون امتداد زوجي 

هيكون كدا server.jpg.exe بيكون واخد امتداد الشئ المدمج معاه 

دا كدا السيرفر لا أزيد ولا أقل 

نيجي بقي إزاي أنا جهازي حد بيدخله او إيميلي بيتسرق 

زاي ما أتفقنا لازم يكون فيه راسل و مستقبل و وسيلة أتصال بينهم إللي هو السيرفر ... دلوقتي لو حد بعتلك سيرفر مثلا زاي إللي شرحته دا و الضحية أستقبله كدا السيرفر هيشتغل داخل جهازة و بتتم عملية الأتصال بين الضحية و الهاكر عن طريق برنامج تحكم عن بعد بيكون مع الهاكر و بيدخل جهازك و بيسرق منه إللي هو عاوزه من باسوردات او صور او ملفات و غيره ......

ممكن تتم عمليه الإختراق برده عن طريق صفحات ملغمه !! 

الصفحات ديه بيكون متحمل معاها سيرفر بمجرد ما تدخل الصفحة ديه و تفتحها من النت السيرفر بينزل علي جهازك و بيشتغل علي طول 

طب إزاي نعرف الصفحات ديه 

لازم لازم لازم لازم و أساسي لو الواحد داخل صفحة و هو شاكك فيها يبص علي الرابط بتاعها الأول 

الصفحة الملغمة هيكون رابطها كدا :: 

www.site name.com/server.exe

طبعا السيرفر واضح انه مدمج معاها 

طب إزاي الأيميل بيتسرق .... بنفس الطريقة برده و حسب السيرفر وظيفتة متبرمج علي ايه 

و من أشهر طرق سرقة الأيميلات .. الصفحات الوهمية !!!

الصفحات ديه بتكون نسخة طبق الأصل من صفحات الدخول و التسجيل للفيس بوك او الياهو او الهوت ميل مثلا 

و طبعا من البديهي و بالعقل كدا .. ميجيش حد يفتح رابط مجهول و يلاقي فيه مثلا صفحة دخول الفيس بوك و يقول انا هتكب بياناتي صباح الخير بليل يعني ... هو بالعقل كدا يابيه ينفع مثلا تروح تسحب فلوس انت حاطتها في مكتب بريد و تسحبها من بنك !! دا منطق

نفس الحكاية صفحات الدخول سواء للفيس او الياهو و ألخ ألخ ايه إللي هيجبها في موقع تاني او رابط غريب غير موقعها الأصلي ... صوح 

يجماعة ... الهاكر لا هو أذكي منك و انت أغبي منه .... كل الحكاية انه بيستغل جهل الضحية و عدم معرفته بالنت 

الأختراق قبل ما يكون ببرامج و طرق و حيل بيكون أختراق فكري الأول يعني بيكون عامل زاي النصاب بيضحك عليك عشان تشرب السيرفر او الرابط المتلغم

و نصيحة .. طول ما الواحد بيستخدم برنامج أنتي فيروس قوي و بيعمله دايما تحديث و بيعمل لنسخة الويندوز تحديث من الأخر حط في بطنك بطيخة بتاعت طووول الموسم مش صيفي بس 

أنا مش شرحت فكرة إختراق المواقع و السيرفرات لأن عيب لما يكون واحد عنده سيرفر او موقع و مش يعرف يعمله حماية كويس عليه 

هحتفظ بيها لنفسي و لكل واحد يعرف في إختراق المواقع و السيرفرات 

دا موقع ممتاز ممكن عن طريقه الكشف عن الروابط المشكوك فيها و الملفات المتفيرسة

https://www.virustotal.com/

اه نسيت..... مفيش حاااااااااااااااااااااااااااااااااااااااااااااااااااااااااجة إسمها أعرف مين دخل بروفيلك ولا حااااااااااااجة إسمها أشترك و أربح أي فون 10 ولا حاااجة أسمها إشترك هتلاقي مين واقفه علي باب البيت عندك 

كل دا هبل في هبل في عبط ... الناس تخلي عندها شويه عقل و تفكيييييييييير و بلاش اي حااااااجة تحت اي مسمي تضحك علييييك و تجري زاي المغفل تشترك فيها 

تصنيف : تكنولوجيا